Cum vittâ crines: tum ramum innectit olivæ. Fit Calybe, Junonis anus templique sacerdos : Et juveni ante oculos his se cum vocibus offert : Turne, tot incassum fusos patiêre labores, Et tua Dardaniis transcribi sceptra colonis? Rex tibi conjugium et quæsitas sanguine dotes Abnegat, externusque in regnum quæritur hæres. I nunc, ingratis offer te, irrise, periclis: Tyrrhenas, i, sterne acies; tege pace Latinos. Hæc adeò tibi me, placidâ quum nocte jaceres, Ipsa palam fari omnipotens Saturnia jussit. Quare age, et armari pubem, portisque moveri,
Lætus in arma para; et Phrygios, qui flumine pulchro 430 Consedêre, duces, pictasque exure carinas. Cœlestûm vis magna jubet. Rex ipse Latinus, Ni dare conjugium, et dicto parere fatetur, Sentiat, et tandem Turnum experiatur in armis. Hîc juvenis, vatem irridens, sic orsa vicissim Ore refert Classes invectas Tybridis undam Non, ut rere, meas effugit nuntius aures; Ne tantos mihi finge metus: nec regia Juno Immemor est nostri.
Sed te victa-situ verique effœta senectus, O mater, curis nequidquam exercet, et arma Regum inter falsâ vatem formidine ludit. Cura tibi, divûm effigies et templa tueri : Bella viri pacemque gerent,-queis bella gerenda. Talibus Allecto dictis exarsit in iras.
At juveni oranti subitus tremor occupat artus; Diriguêre oculi: tot Erinnys sibilat hydris, Tantaque se facies aperit. Tum flammea torquens Lumina, cunctantem, et quærentem dicere plura, Repulit, et geminos erexit crinibus angues,
Verberaque insonuit, rabidoque hæc addidit ore : En ego victa situ, quam veri effœta senectus Arma inter regum falsâ formidine ludit.
Respice ad hæc adsum dirarum ab sede sororum : Bella manu letumque gero.
Sic effata facem juveni conjecit, et atro
Lumine fumantes fixit sub pectore tædas.
Olli somnum ingens rumpit pavor: ossaque et artus Perfundit toto proruptus corpore sudor.
Jue Arma amens fremit; arma toro tectisque requirit. Sævit amor ferri, et scelerata insania belli,
Ira supèr. Magno veluti quum
Virgea suggeritur costis undantis aheni, Exsultantque æstu latices: furit intus aquaï Fumidus atque altè spumis exuberat amnis : Nec jam se capit unda; volat vapor ater ad auras. Ergo iter ad regem, pollutâ pace, Latinum Indicit primis juvenum, et jubet arma parari, Tutari Italiam, detrudere finibus hostem;
Se satis ambobus Teucrisque venire Latinisque. Hæc ubi dicta dedit, divosque in vota vocavit, Certatim sese Rutuli exhortantur in arma. Hunc decus egregium formæ movet atque juventæ, Hunc atavi reges, hunc claris dextera factis.
Dum Turnus Rutulos animis audacibus implet, Allecto in Teucros Stygiis se concitat alis, Arte novâ speculata locum quo littore pulcher Insidiis cursuque feras agitabat Iülus. Hîc subitam canibus rabiem Cocytia virgo Objicit, et noto nares contingit odore,
Ut cervum ardentes agerent: quæ prima laborum Causa fuit, belloque animos accendit agrestes. Cervus erat formâ præstanti et cornibus ingens; Tyrrhida pueri quem matris ab ubere raptum Nutribant, Tyrrheusque pater, cui regia parent Armenta, et latè custodia credita campi. Assuetum imperiis soror omni Silvia curâ
Mollibus intexens ornabat cornua sertis,
Pectebatque ferum, puroque in fonte lavabat.
Ille, manum patiens, mensæque assuetus herili,
Errabat silvis, rursusque ad limina nota Ipse domum serâ quamvis se nocte ferebat. Hunc procul errantem rabidæ venantis Iüli Commovêre canes, fluvio quum fortè secundo Deflueret, ripâque æstus viridante levaret. Ipse etiam, eximiæ laudis succensus amore, Ascanius curvo direxit spicula cornu : Nec dextræ erranti deus abfuit; actaque multo Perque uterum sonitu perque ilia venit arundo. Saucius at quadrupes nota intra tecta refugit, Successitque gemens stabulis; questuque, cruentus,
Atque imploranti similis, tectum omne replebat. Silvia prima soror, palmis percussa lacertos,
Auxilium vocat, et duros conclamat agrestes. Olli (pestis enim tacitis latet aspera silvis) Improvisi adsunt; hic torre armatus obusto, Stipitis hic gravidi nodis: quod cuique repertum
Rimanti, telum ira facit. Vocat agmina Tyrrheus, Quadrifidam quercum cuneis ut fortè coactis Scindebat, raptâ spirans immanè securi. At sæva e speculis tempus dea nacta nocendi Ardua tecta petit stabuli, et de culmine summo Pastorale canit signum, cornuque recurvo Tartaream intendit vocem; quâ protenus omne Contremuit nemus, et silvæ intonuêre profundæ. Audiit et Triviæ longè lacus; audiit amnis Sulfureâ Nar albus aquâ, fontesque Velini; Et trepida matres pressêre ad pectora natos. Tum verò ad vocem celeres, quâ buccina signum Dira dedit, raptis concurrunt undique telis Indomiti agricolæ ; nec non et Troïa pubes Ascanio auxilium castris effundit apertis. Direxêre acies: non jam certamine agresti, Stipitibus duris agitur, sudibusve præustis; Sed ferro ancipiti decernunt, atraque latè Horrescit strictis seges ensibus, æraque fulgent Sole lacessita, et lucem sub nubila jactant : Fluctus uti primo cœpit quum albescere vento, Paulatim sese tollit mare, et altiùs undas Erigit, inde imo consurgit ad æthera fundo. Hic juvenis-primam ante aciem, stridente sagittâ, Natorum Tyrrhei fuerat qui maximus, Almo Sternitur hæsit enim sub gutture vulnus, et udæ Vocis iter tenuemque inclusit sanguine vitam. Corpora multa virum circà; seniorque Galæsus, Dum paci medium se offert, justissimus unus Qui fuit, Ausoniisque olim ditissimus arvis : Quinque greges illi balantûm, quina redibant Armenta, et terram centum vertebat aratris.
Atque ea per campos æquo dum Marte geruntur, Promissi dea facta potens, ubi sanguine bellum Imbuit, et primæ commisit funera pugnæ,
Deserit Hesperiam, et, cœli conversa per auras, Junonem victrix affatur voce superbâ : En perfecta tibi bello discordia tristi: Dic in amicitiam coëant, et fœdera jungant; Quandoquidem Ausonio respersi sanguine Teucros. Hoc etiam his addam, tua si mihi certa voluntas; Finitimas in bella feram rumoribus urbes, Accendamque animos insani Martis amore,
Undique ut auxilio veniant; spargam arma per agros.
Tum contrà Juno: Terrorum et fraudis abundè est: Stant belli causæ ; pugnatur comminus armis; Quæ fors prima dedit, sanguis novus imbuit arma: Talia conjugia et tales celebrent hymenæos Egregium Veneris genus et rex ipse Latinus. Te super ætherias errare licentiùs auras Haud pater ille velit summi regnator Olympi; Cede locis: ego, si qua super fortuna laborum est, Ipsa regam. Tales dederat Saturnia voces. Illa autem attollit stridentes anguibus alas, Cocytique petit sedem, supera ardua linquens. Est locus, Italiæ medio sub montibus altis, Nobilis, et famâ multis memoratus in oris, Amsancti valles; densis hunc frondibus-atrum Urget utrimque latus nemoris, medioque fragosus Dat sonitum saxis et torto vortice torrens. Hic specus horrendum, sævi spiracula Ditis, Monstratur; ruptoque ingens Acheronte vorago Pestiferas aperit fauces, queis condita Erinnys, Invisum numen, terras cœlumque levabat.
Nec minùs interea extremam Saturnia bello Imponit regina manum. Ruit omnis in urbem Pastorum ex acie numerus: cæsosque reportant, Almonem puerum, fœdatique ora Galæsi ; Implorantque deos, obtestanturque Latinum. Turnus adest, medioque in crimine cædis et ignis Terrorem ingeminat; Teucros in regna vocari, Stirpem admisceri Phrygiam; se limine pelli. Tum quorum attonita Baccho nemora avia matres- Insultant thiasis, neque enim leve nomen Amatæ, Undique collecti coëunt, Martemque fatigant. Ilicet infandum cuncti contra omina bellum, Contra fata deûm, perverso numine poscunt: Certatim regis circumstant tecta Latini.
Ille, velut pelagi rupes immota, resistit ;
[Ut pelagi rupes, magno veniente fragore,]
Quæ sese, multis circùm latrantibus undis,
Mole tenet: scopuli nequidquam et spumea circùm
Saxa fremunt, laterique illisa refunditur alga.
Verùm, ubi nulla datur cæcum exsuperare potestas Consilium, et sævæ nutu Junonis eunt res, Multa deos aurasque pater testatus inanes,
Frangimur, heu! fatis, inquit, ferimurque procellâ. Ipsi has sacrilego pendetis sanguine pœnas,
O miseri! te, Turne, nefas, te triste manebit Supplicium; votisque deos venerabere seris. Nam mihi parta quies, [omnisque in limine portus ;] Funere felici spolior. Nee plura locutus,
Sepsit se tectis, rerumque reliquit habenas.
Mos erat Hesperio in Latio, quem protenus urbes Albanæ coluêre sacrum, nunc maxima rerum Roma colit, quum prima movent in prælia Martem, Sive Getis inferre manu laerymabile bellum, Hyrcanisve, Arabisve-parant, seu tendere ad Indos, Auroramque sequi, Parthosque reposcere signa. Sunt geminæ belli portæ, sic nomine dicunt, Relligione sacræ, et sævi formidine Martis : Centum ærei claudunt vectes, æternaque ferri Robora; nec custos absistit limine Janus. Has, ubi certa sedet patribus sententia pugnæ, Ipse, Quirinali trabeâ cinctuque Gabino Insignis, reserat stridentia limina consul; Ipse vocat pugnas: sequitur tum cætera pubes, Æreaque assensu conspirant cornua rauco. Hoc et tum Eneadis indicere bella Latinus More jubebatur, tristesque recludere portas. Abstinuit tactu pater, aversusque refugit Foda ministeria, et cæcis se condidit umbris. Tum regina deûm, cœlo delapsa, morantes Impulit ipsa manu portas, et cardine verso Belli ferratos rupit Saturnia postes. Ardet inexcita Ausonia atque immobilis antè : Pars pedes ire parat campis; pars arduus altis Pulverulentus equis furit: omnes arma requirunt : Pars leves clypeos et spicula lucida tergunt Arvinâ pingui, subiguntque in cote secures; Signaque ferre juvat, sonitusque audire tubarum. Quinque adeò magnæ positis incudibus urbes Tela novant; Atina potens, Tiburque superbum, Ardea, Crustumerique, et turrigeræ Antemnæ. Tegmina tuta cavant capitum, flectuntque salignas Umbonum crates; alii thoracas ahenos, Aut leves ocreas lento ducunt argento. Vomeris huc et falcis honos, huc omnis aratri Cessit amor; recoquunt patrios fornacibus enses. Classica jamque sonant: it bello tessera signum. Hic galeam tectis trepidus rapit; ille frementes
« AnteriorContinuar » |