And left thair king but ony but or beild,
With few feiris remanand in the feild.
The Inglismen that la into the slak,
Quhen it wes so, come in behind thair bak
In gude array with mony pynsall proude,
Rycht suddantlie with mony schout full loude.
Quhairof greit terrour in the tyme did tak
The Scottis all, seand behind thair bak
So braid ane battell cumand neirband by,
Behind thair bak with mony schout and cry.
The Inglismen, that fled fra thame befoir,
Turnit agane with mekill bost and schoir,
Richt suddantlie quhen tha saw sic supple;
The Scottis all tuke purpois than to fle,
Befoir thair face seand so greit ane rout,
Behind thair bak heirand so mony schout.
Quhairfoir that tyme richt mony men of gude
Fled to the king middis the feild that stude,
And all the laif quhilk war out of array,
Tha left the feild and fled out of the fray.
This king Williame efter his folk war fled,
With the small power in the tyme he hed,
On euerie syde with his fa sett about,
Weill wist he' nocht quhair than he suld wyn out. Ane lang quhile so at his defence he stude
Rycht manfullie agane that multitude,
Quhair mony sutheroun in that tyme wer keild, 43,310
Quhill [he] on force wes tane syne in the feild.
Syne all the laif that tyme with him he hed,
Seand him tane out of the feild tha fled,
With litill skayth suppois tha war bot few,
Syne till ane strenth wes neirhand by tha drew. 43,315 So beand done as I haif said all thing,
In Normondy tha hed Williame the king
To king Henrie, quhair he did lang remane,
Quhill efterwart till he come hame agane.
The Inglismen haifand sic victorie,
So proude tha war than for the samin quhy,
With all thair power pertlie did persew,
Gif tha agane mycht Cumberland reskew.
Gude Gillecrist of Angus that wes lord,
And als Rannald of quhome I did record,
With mony freik agane thame maid defence,
And sparit nocht for travell nor expens.
Thir worthie men, that wer bayth wyss and wycht,
Rycht manfullie debaittit all thair richt,
Quhill all tha weiris cuming war and gane;
Syne at the last betuix thame trewis wes tane
On this maner as I sall to 30w sa:
That Huntlyngtoun and also Cumbria.
Scotland sall haif without ony demand;
Ingland siclike alhaill Northumberland,
Ay and quhill that this king Williame be
Deliuerit furth of his captiuitie.
Ane thousand zeir and ane hundreth also,
Sextie and four withoutin zeiris mo,
Of Christ Jesu, that done wes all this thing,
And the nynt zeir of this king Williams ring.
Heir will I leif of this mater ane quhile,
And turne I will to vther talk my style.
In Cantirberrie,' as all the warld knawis,
Ane halie bischop wes, as my author schawis,
In all his tyme withoutin cryme or blame,
Quhilk callit wes Thomas to his name,
The kirk of Christ did in his tyme decoir;
Quhilk flemit wes with king Henrie befoir,
The libertie becaus he did defend
Of halie kirk, as it is rycht weill kend.
Befoir the tyme the space than of tua zeir,
That this wes done, as I haif said 30w heir,
At the requeist than of the paip of Rome,
Hecht Alexander, gif I richt presume,
And Lues als, the nobill king of France,
Also Philip gudlie till advance,
The nobill erle of Flanderis in his dais,
At thair requeist than, as my author sais,
This halie bischop, laulie and benyng,
Ressauit wes in Ingland with the king.
Thocht he forgaif him with his word outwart,
3it neuirtheles richt clois in to his hart It stak full still als het at ony fyre,
Lurkand full law with greit malice and ire,
Of this bischop the greit stabilitie
In the defence of richt and libertie
Of halie kirk, the quhilk he did defend.
Quhairfoir this king, as it wes rycht weill kend,
HOW KING HENRIE OF INGLAND CAUSIT SLAY
THOMAS, BISCHOPE OF CANTURBERRIE, AND
DENYIT QUHEN HE HAD DONE.
In Cantirberrie of 3ule the fyft da,
Into the kirk, as my author did sa,
This ilk bischop, of quhome befoir I schew,
At the hie altar cruellie tha slew.
Quhilk efterwart this cruell king Henrie
Baith men and deid richt faslie did deny.
In Rowane syne, efter the secund zeir
That this wes done as I haif said 30w heir,
Into the kirk, gif that I richt presume,
Quhair present war tua cardinallis of Rome,
Also of vtheris ane greit multitude,
Into the tyme neirby thame thair that stude,
Befoir thame all this king his God forsuke,
And swoir also vpoun the evangell buik,
That he wes saikles of this bischopis deid.
Sone efter [that] forthocht and socht remeid,
The stang of conscience broddit him so soir,
That he forthocht all that he did befoir;
Syne sark allane, for mair mereit and meid,
And barfeit als to Canterberrie zeid,
Befoir his graif, or than my author leis,
Lib. 13, f.201b. Richt humblie thair sittand on his kneis,
Col. 1.
In that same place quhair that his blude wes
spilt,
Greittand for grace, confessit all his gilt.
This ilk bischope, as halie kirk now grantis,
Rycht hie in heven is numberit amang the sanctis,
And for ane martir also haldin is he
Be halie kirk quhilk hes auctoritie.
Quha list of him to heir now ony mair,
Gang luke his legend, tha will find all thair
The nobill werkis in his tyme he did,
And ilk miracle efter sensyne he kid.
Richt langsum [wer] to me to tell for-thi,
Thairfoir as now I lat thame all go by;
Sic to reherss I will nocht heir remane,
Now to my purpois pas I will agane.
HOW DAUID, BRUTHER TO KING WILLIAME, COME
IN SCOTLAND AND WES GOVERNOUR IN AB-
SENCE OF HIS BRUTHER, QUHA REWLIT THE
CUNTRE AT REST, AND HOW THAI SEND ANE
AMBASSADOUR FOR TO REDEME AND BRING
HAME KING WILLIAME.
Quhilk in Scotland resauit wes rycht weill,
In all his tyme, as far as I haif feill,
Plesit the pepill ay with equitie,
In ilk mater so trew and just wes he.
Quhen to gude poynt than put wes euerie
With haill consent for to redeme thair king,
Ane ambaxat' send into Normondy
Of nobill men onto this king Henrie :
Thair principall, as that my author sais,
Wes ane hecht Richard, bischop in tha dais
Of Sanct Androis; ane nobill man wes he,
And all his tyme of greit auctoritie.
|