Syne on hir brow, withoutin ony baid,
The croce of Christ thair with his hand he maid,
Beteichand hir to him that bocht ws deir;
And with that word scho rais vp haill and feir
Vpoun hir feit withoutin ony moir,
As scho had aillit neuir ill befoir.
The pepill all that standand thair wer by,
Quhen that tha saw sa sone and suddantly
That zoung virgin restorit to hir heill,
Richt weill tha knew God wald nocht lat
conceill
Sic halines into that king wnknawin,
At his requeist that greit miracle hes schawin.
Fra that tyme furth, as that my author sais,
In moir honour tha held him all his dais,
With all the pepill reput for ane sanct,
The quhilk to ressone wes so consonant.
In Scotland syne, efter that he come hame,
All halie place of honour and of fame
He viseit syne in gude and clene intent,
And dotit thame with mony riche rent.
Of Lesmorens the bischop in Argyle,
Fundit and feft into that samin quhile.
Heir will I leif ane litill space and tell
Of aduenture befoir this tyme befell.
OFF ANE GREIT SPAIT AND TEMPEST OF WEIT
THAT DID GREIT SKAYTH IN BARTHA TOUN,
AND SINDRIE PEPILL THAIRIN DID DROUN BE
THE EFFLUX OF AMOND AND TAY.
Off Bartha toun quhilk in that samin da
At Amond mouth stude on the water of Ta,
Weill wallit wes with stone and lyme about,
And mony foussie cassin als without;
Schort quhile befoir into the samin zeir,
Sic thing wes done as I haif said 30w heir,
Vpoun ane nycht quhen it wes mirk and lait,
Out of the hillis thair come sic ane spait,
With so greit force als fast as it mycht flow;
Quhilk causit hes the tua fluidis to grow,
Amond and Tay, into sic quantitie,
That throw the greit impetuositie
Of tha fluidis it brak the wallis doun,
Syne with greit force it enterit in the toun.
Quha had bene thair into the tyme to heir
The aufull schout, the greit noyis and beir,
Quhen that the flude, with sic ane hiddeous sound,
Richt mony ludging law buir to the ground;
And mony one into the streit that stude,
Disconfeist war and drownit in the flude ;
And mony one into thair bed that la,
With that same flude war borne quyt awa,
Or euir tha wist, or walknit of thair dreme,
Nakit and bair lay fleittand in the streme.
The samin tyme now that ze heir me mene,
Gude Amengard, to Williame that wes quene,
Remanand wes within the samin toun,
Quhen hapnit all this haistie confusioun.
Hir awin self, withoutin ony leis,
With greit perrell wmschewit fra that preis;
Hir zoung sone Johnne in his creddill that lay, 44,650
With his nureis, war borne baith till Tay;
And tuentie also of hir houshald men,
And of hir madynnis other nyne or ten,
And mony vther worthie nobill wicht,
All into Tay wer dround that samin nicht.
Of this mater heir will I mute no moir.
This king Williame, of quhome I spak befoir,
Sone efter this, as 3e sall wnderstand,
That he come hame now laitlie fra Ingland,
To Bartha toun and saw it so distroyit;
Quhairof than he wes greitlie anoyit,
The veritie thairof quhen he did ken,
Baith for the toun and also for the men
Distroyit wes that tyme into the flude,
With gold, riches, and mekle vther gude.
44,660 Lib. 13, f.206b. Col. 1.
HOW THE TOUN OF SANCT JOHNISTOUN CALLIT
PERTH WAS FOUNDIT AND TUKE BEGYNNYNG
BE KING WILLIAME
This nobill king tuke purpois to remane,
Quhill that he gart reforme the toun agane.
Syne when he knew in sic perrell it stude,
On euerie syde of greit watter and flude,
Changit his mynd within ane litill space,
Translaittand it intill ane vther place
Doun vpoun Tay into the samin quhile,
Out of that steid the space heir of tua myle.
Syne foundit thair of greit honour and fame
Ane nobill toun, callit Perth toun to name,
Efter the name than of ane nobill man,
Callit Perthus, quhilk wes the first began,
Of frie motiue without compulsioun,
Landis or rent for to gif to that toun.
The toun of Perth zit to the name is cald,
With derogatioun to the name of ald;
The quhilk befoir that callit wes Bartha,
Sanet Johnistoun is callit now this da.
This king Williame that foundit hes and feft
This nobill toun, that tyme or he it left,
Greit priuiledge and fredome to it gawe,
That neidfull war to ony toun to haue,
Into the eiking of thair increment,
Possessand it with landis and greit rent.
This thing wes done as I haif said 30w heir,
Quhen of oure Lord tua hundreth and ten zeir,
Ane thousand than to eik to thame also,
Compleittit wes perfitlie and no mo.
The secund zeir efter that this we[s] done,
Subjectit wes vnto this ilk king Johnne
The Waillis all, as my author did sa,
The best part als than of Ybernia.
In this same tyme now that ze heir me reid,
Ane rank revar that callit wes Gothreid,
Mak-Williames sone of quhome befoir I tald,
Come into Ross with mony berne full bald,
And greit injuris wrocht ouir all the land.
Quhen to king Williame done wes wnderstand,
That this Gothreid, with mony commoun theif,
Within his landis had done sic mischeif,
Quhair that he sparit nother man no wyfe,
Than gude MakDuff the nobill erle of Fyiff,
And of Athoill the worthe erle also,
And thane of Buchane with thame for till go,
Sex thousand men that stalwart war and strang, 44,710
With thir lordis king Williame maid till gang.
Baith da and nycht ouir mony mont and moss,
Tha passit syne quhill that tha come till Ross,
That samin tyme quhair tha this Gothreid fand.
In battell syne with mony birneist brand
Tha vincust him, fechtand vpoun ane plane,
Quhair mony one than of his men war slane ;
Him self in handis taikin wes also
Richt sair woundit, and mony vther mo
Into the tyme all bludie and forbled;
And hed nocht bene he wes the soner sped
Onto the king, withoutin ony stryffe,
So woundit wes he had loissit the lyfe.
And quhen the king knew he wes neirhand deid,
Richt haistelie he gart stryke of his heid,
Syne on ane staik gart set it vp full hie,
In publict place quhair euerie man mycht se.
The laif also than of his men war tane,
Vpoun ane gallous maid thame all to grane.
HOW KING JOHNNE OF INGLAND SPULZEIT THE
KIRK, AND TUIK ALL IN HIS AWIN HAND,
AND BANEIST THE BISCHOPE OF CANTERBERRIE
WITH ALL HIS CONVENT.
Neirby the tyme that all this thing wes done, 44,730
The king of Ingland, that callit wes Johne,
Richt wranguslie begouth than for to work
With greit oppressioun vpoun halie kirk.
This wes the thing that he did at thame craue,
Of all thair rent the tent part for to haif;
Quhilk schortlie all tha did ilkone deny.
Of Canterberrie for the samin quhy,
The nobill bischop, callit Stevin to name,
He baneist him but ony vther blame.
The monkis all, and priour to also,
All sindrie gaittis maid thame for till go,
With pouertie to leif that tyme richt puir,
And of thair rentis tuke the gyde and cuir.
Bayth of thair kirkis also and of thair land,
The fructis all he tuke in his awin hand
Till his awin vse, withoutin ony caus,
As he lykit for to alledge the lawis.
Of Sistersens siclike ane fair abba,
That samin tyme, as my author did sa,
Becauss tha monkis wald nocht gif him till
Tua thousand pund at his plesour and will,
He gart thame all within ane litill space,
Excludit be ilkane out of thair place,
|