X.

Pudor.

Αἴσχεα δειδιότες καὶ ἐνείδεα.

DILECTA cœli progenies, Pudor!

Puro supremus quem Pater æthere

Demisit in terras, potentem

Rite

vagos revocare mores

Ad sancta Recti limina; et addere

Insanienti vincla Licentiæ,

Mentemque delicto paratam In media cohibere culpa: Secretus imo corde nocentium Curas, et acres exacuis metus, Scelusque furtivum sequaci Exagitas face certus ultor. At innocenti gratior assides Menti magister: gaudet enim tuæ

Parere tutelæ, vigetque

Voce tua stabilita virtus.

Tu castitati te comitem admoves

Semper decorum: non oriens aquas

Aurora fulgentes colorat

Splendidior, variumque cœlum,

Quam tu pererras virginum amabili
Genas rubentes luce modestiæ,

Rosasque vivas per venusta

Ora seris, nitidumque collum.

Tu claustra avaræ dura aperis manus:
Fœdæque somnos rumpis inertiæ:

Tu cogis imbellem frementes

Militia tolerare fluctus.
O nostra lenis pectora temperes!

Semperque præsens, et precor, integrum
Fidus per infestas tueri

Illecebras vitiosiorum.

W.

XI.

Collegium S. Mariæ Magdalenæ.

Dulces... reminiscitur Argos.

AUGUSTA circum moles, et dædala prisci

Artificis cælata manu miracula turres;

Vos, nemus et ripæ virides, dilectaque Phoebo
Atria, carminibus quondam loca conscia nostris,
Irriguos Cervellus ubi prælabitur agros !

Quæ vel adhuc absens video, non immemor unquam,

Vanaque me ludit species, et amabilis error;
Ut redit illius placidus mihi temporis ordo,
Quo vacuus curis Musarum ego sedulus hortos
Lustrabam, studiis florens ignobilis otî.

Quod mihi si, vestris ex quo caruisse latebris
Strenua me jussit cessantem vita, pedumque
Quod novus erepto custos pastore recepi,
Otia Pierio non sint concessa sub antro;
Sed meliora sequens cœlesti fervidus æstu
Appetat illimes animus mihi sanior haustus,
Nec nisi divino velit indulgere furori :
Fas tamen et nunc sit colles paulisper amœnos
Prataque Castaliis reminisci lucida rivis.
Scilicet has olim gratas meditantibus umbras
Ingenuo cantu spatiatus mulsit alumnus
Post alios alius; nec defuit alter adulto
Vate tener, sylvæque recens et numinis hæres.
Et, precor, o desit nunquam; sed, qualis et ante,
Alma tuo nutrix pubes succrescat honori!
At sua quæque vices patiuntur; et illa fuerunt
Tempora: mutatis nec, quæ placuere, placebunt.
Quin tibi si Graiæque lepos Latiæque Camœnæ
Sordeat, et positi capiant fastidia plectri;
Præmia si lauri numeris desueta canoris

Negligat, infelix studiorum, inculta juventus ;
Tunc, Rhedycina, tuos (absint procul omina dictis!)
Pieria tandem spoliatos fronde penates,

Hoc nemus, hos fontes, et quæ pulcerrima conjux
Rura suo Thamæ dotalia tradidit Isis,

Deseret indignans Phœbi chorus omnis; amatum Deseret hospitium, quo non optatius olim

Præbuerant dulces, heu! flebile nomen, Athenæ.

XII.

Pisgæ Specula.

DEUT. XXXIV.

CONSTITIT Optatæ propter confinia terræ,

Qua speculum ex alto vertice Pisga dabat: Constitit, atque acie nondum languente, Moyses Subjectos avido lumine lustrat agros. Hinc, et Amorrhea valles et pascua cerni, Quosque alit innumeros læta Peræa greges. Hinc, et qua Paneæ Jordanes fontibus ortus Centum antiqua sacris oppida lambit aquis : Roscidus inde Hermon, Libanique halantia longe Culmina, odoratis stant redimita cedris.

B.

Parte alia regum sedes, atque inclyta posthac
Illa Sionæa quæ foret arce Salem.
Nec tu, Jessiacæ fausta incunabula prolis!

Sis licet exiguo limite clausa, lates,
Bethlemia unde olim sese mortalibus ægris
Proderet exacto tempore missa Salus.
Conspicit hæc vates: neque enim conceditur ultra,
Et prohibet terra sors propiore frui:

At juvat aspicere, atque animo longinqua tueri
Fata virûm, et populo debita regna suo.

W.

XIII.

Socratis Mors.

Est hic, est animus lucis contemtor, et istum
Qui vita bene credat emi, quo tendis, honorem

LAURIGER emensus tandem chorus æquora pompæ
Conscia Deliacæ, reduci pede sospes arenas
Attigit optatas, Piræaque mœnia fausto

Quassa fremunt plausu, vocisque resultat imago.
Densa jacent sparsi passim per compita flores,

Virgineæ pia dona manus; juvat addere cultis